Ayakplo ba Okpokpo (Things to Do)

By Luka Masin

Ayakplo ba okpokpo a shki óbiŋ endzendze. E da gi e mbli ábze e ka. Á og’ba ba ebla, e da gi e ka ayakplo fi. Agimi ánáŋ e yi mbo ángyiŋ? Okykueshimbo ame elúegba e ygí moare la a yi odaŋ ángyiŋ. Mā odaŋ o wó éshri are ómba baŋ awoesõma sha. Okykueshimbo ashe la a kyu ebla odaŋ o b’bi ŋa o zgá ábgo anom baŋ eka ba anom lo awoesõma sha. Ambo owo ba anom baŋ a kpu le, aŋa a ngla a sku odaŋ ba ebla. Ekahelo nga, mo á bzi ŋa ashe la aríeshra owo baŋ a dzu ta-la anom hwõ ómba ba anom baŋ awoesõma. Ambo owo ba anom baŋ a kpu le, aŋa a gro a sku odaŋ milo, nga owo baŋ a kyu anom hwõ le, aŋa aríeshra ángyiŋ mbo. Ekekahelo ángyiŋ, agimi ánáŋ, agimi ambo e kpu ókro odaŋ íbu eg’ba ba Ekristi, okyku da agimi e wo ba arehwõ, ba are mo a vro ŋa éku, okyku da agi e fu ágbro okyku Ahogbmre. Okykueshimbo ómba ba agi e la e kpó ayakplo ba eg’ba, okayiogro ba odlobi byi, o kso íbu odaŋ ángyiŋ, o la o kpo otum á eg’ba byi okyku da agi e kpó ayakplo ba eku. Ambo ohuhuhi agi e ngla e sku odaŋ lo, okyku ba agi e kpu ókro ekplo la e vu gi e zga awahrẽ, okyku da agi e kpo otum ózhẽ olohe ba Ogbgaodzi ambo ózhẽ ologbyi ba etaŋakpa odaŋ mo a ta ángyiŋ mbo.

Obaoha, e da gi e mbli ayakplo ábze e ka éshri Odaŋ ta-la Odlobi. Agi nga é lu lā eshi? Mā odaŋ o wo odlobi ángyiŋ? Owoekahe ángyiŋ mbo! Egyigyiloambo alo a wo odaŋ lo ángyiŋ mbo embyi, ame e yi odlobi mbo. Embyi ame e yi eka ba ogroayi éme are e wo mbo, owo ba odaŋ o lu lo mbo le, mā, “Aŋo okayiogro mbo.” Ambo odlobi, o hwyeŋ ozhẽ o shri edgu okayiogro ŋa ambo o ta me okyku odaŋ. Okykueshimbo owo okyku odaŋ ángyiŋ mbo embyi, odlobi o wo okom ototno. Ame embyi ewoesõma ómba ba odaŋ owombo, ambo ómba ba odaŋ lo o ba nga, odlobi odzuayi nga ame e kpu.   Onyonye la o hwim ba o shri esõ o di, o dzu eka ba alo a kpu ókro me. Okykueshimbo odlobi o hwyeŋ anvaŋ íbu onyonye lo, o byle me nga alo o bga me.

Okykuekahe odaŋ lo o wo esesla. Nga onyonye lo o wo esesla, ta-la oshasha ta-la adzadzi. O dzu eka ba ekplo edzadzi e shri eku e kom me ángyiŋ? Ombo ku-ku! Odlobi ángyiŋ o la o shri eku o kom me íbu ekplo la e wo adzi, okyku da odlobi o tsa ba alo o wo odlobi, nga íbu onyonye lo da alo a dzu odlobi a bmyi eygi.

Otamama, e da gi e sa e mbli ayakplo ábze e ka éshri okykuebzu la o wo ka-la agi. Okykueshimbo agi e yi ba odaŋ o wo ogbga ángyiŋ, ambo ame e wo ba eg’ba la e shri eŋa e gbmo odlobi. Okykueshimbo ame e ka ayakplo ba ame e kpo e bmye mbo. Okykueshimbo ame e kpo ekplo ba ame e klo mbo, ambo me e kpó ekplo ba ame e sa e tla lo ángyiŋ. Ohuhuhi owo ba ame e kpo ekplo ba ame e klo mbo ángyiŋ le, ame e bmi ta-la odaŋ lo, ba alo a wo adzadzi.   Okykuekahe ohuhuhi, ame ángyiŋ e wo la e kpo lo nga mbo, ambo odlobi la o wó ésõ me éshyẽ ángyiŋ. Okykueshimbo ame e yi ba ekplokyeŋ edzadzi e wo ka-la ame mbo. O dzu, á eg’ba me. Okykueshimbo ame e wo aga ba o kpo ekplo la e wo shasha, ambo me e wo la oshye ba o kpo lo mbo. Okykueshimbo ame e kpó odzudzi ba ame e kló mbo. Ambo obubi ba ame e kló mbo ángyiŋ, me e la ebreayi e kpó.   Ohuhuhi owo ba ame e kpo ekplo ba ame e kló mbo le, ame ángyiŋ e wo la e kpo lo nga mbo, ambo odlobi la o wó ésõ me éshyẽ ángyiŋ.

Okykuekahe ame e ka lo a dzu odaŋkyeŋ ángyiŋ, mā ómba ba ame e kló e kpo shasha, obubi o wo sku égbaŋ me. Okykueshimbo ame egŋóraŋ ta-la odaŋ ba Ahogbmre, á esõ me éshyẽ. Ambo ame e ka odaŋ hwõ o la o kpó ombgu ta-la odaŋ ba agaesõ me, nga lo o da me e dzu awahrẽ ba odaŋ ba odlobi la o wó á eg’ba me. Ame e wo ekŋre arehwĩ ototno! Ayi á ya á shla me á sku eg’ba ba eku hi? Ovye o wo ba Ahogbmre íbu Eyesu Ekristi Adigiodne! Okykuekahe nga, ame ababgo me e kpo otum ba odaŋ Ahogbmre ta-la agaesõ me. Ambo me e kpo awahrẽ ba odaŋ ba odlobi ta-la eg’ba me.

Nga odlo ba emvye ba? Agimi Egŋo e da gi e dzú áhwyi ma fi mbo? Omba emvye o ra nga ba! Eyi la e bá he nga, mo á zga esĩ á ta emvye ba ori ámo. Nga olulu ba Egŋo éshri lo o wo eshi? Okpokpo byi Egŋo á emvye la e bá helo o wo eshi? Agi é yi egiŋa? Agi é ta ayi? Okayiozhẽ ŋa o wo gi ma? Agimi moadigi e bzi eshki ekeka mbo? Agimi ándak’po e kpo akplokyeŋ mbo? Agimi áreŋ ba Egŋo ekaebre á esakpa mbo? Agi Egŋo é kpo emvye lo mbo? Ángyiŋ mbo embyi, okro o dum yoŋ ekahe eshi? Omba o ra hre sha, agimi edzutki ekahe eshi ámo? Mo Asasaŋ he á dzu ek’po éshri byi ba gbagbu ángyiŋ? Agi e vro énu mbo? Areŋa ambo á dzu eŋeŋa ekahe, ba emvye e bá la ovovo he? E da gi etneaga e yi ogyugyuŋ nga e vu ayakplo abgo adzadzi e gre ekahe. Owomimbole, alo ó no gi pyme ó greshri, owo ba moazhẽ he a bla a ri oreŋ éshri byi atama a gre ekahe. Awoo! Ekplo ayiekŋre loo!

Ayakplo áhwõ la a ra a shki ba okpokpo, agi é mbli mo é ka ómba hwõ dne ámo. Ahogbmre a da gi ekaebmye EBEE! Amin!