Eshi e La e Kpó? What Is Happening?

By Luka Masin Esq.

07036230998

Eshi e la e kpó óbiŋ Enigeriya? Eshi e la e kpó óbiŋ ba Anasarawa? Eshi e la e kpó óbiŋ Egŋo? Ame e la e gŋó eshi ekami? Egba ba eshi mvye ekahe? Ame e ka lā alo o khwo gu la. Ame e ka lā emvye e khwo nga okro ó dum neŋ ámo la. Ambo ame e la e gŋó eshi ekahe? Ame e la e ká eshi ekami? Ogre yaŋ ekahe? Eshi e la e kpó ekahe?

Anwyeamomabgo Moa-Egŋo a bla a ba bgu. A ba la ogre baŋ he bgu. A lú ányuŋ ayakplo moandak’po sha. A kplá egba la e súŋ okro zẽ. E ka la, mā eshi hi! E da me e ka eme ba, mā eshi e la e kpó ba eshi ámu? Ambo agimi áhẽ ambo bá, egba he ángyiŋ nga agimi e la e lú hi? Anyuŋ odlo ekahe nga agimi e la e tsá Anwyeamomabgo Moa-Egŋo atsa, nga e shráŋ ŋa ekahe? E gbu esõ óbiŋ, e da gi e ngli e gŋo odlo baŋ lo fi ekeka.

Agimi la e zhĩ me he, eshi e la e kpó egi byiŋ? Owo ba akplokyeŋ a kpo egi byiŋ a ka mbo ku-ku le, agimi etseadzi egreshri. Óbiŋ ba Enigeriya byi enuenum pyeŋ agi e la e gŋó okũ ba moagogro ta-la moakŋre a la a wú, eka ba algóri a wo egbmo agreshri. Moare awúokũ hré eka ba egzu awargi ba akpukplu e wo egbmo e gre moagogro eshri. Moare awúokũ eka esi ba moandak’po a la a si ámgbaŋ ba ogomnati. Moaekŋre awúokũ eka ba adlidzi a wó ákuombgu nga mbo. Moare awúokũ eka okayiekŋre a blu a sku eshki moarehwĩ. Moare awúokũ eka ba odaŋ ba obiŋ byi o wo oshye ma nga mbo. Moare awúokũ eka ba ebga e wó ókroŋa ambo. Mo a bgá moagogro ágbi énuenum mre. Moare awúokũ eka ba oklo o wo ta-la moarehwĩ nga mbo. Onáŋ osmáyi nga okro osláyi kpaŋ okyku ba onáŋ o wo adzadzi nga mbo. Moanáŋ a sla emo a klá agbi pa-la emo. Moanwye a kpó ambgu ta-la moandimo ta-la moandak’po a kpó ándzi mbo.

Mā eshi? É, mā eshi e la e kpó óbiŋ Egŋo? E ygi ayaŋ fi ayga, alo o ya o ra ogreshri. Agi e ya  e wó á Enigeriya áyga, gi e ba obiŋ ba Anasarawa awombo nga agi eka e gbú óbiŋ Egŋo ambo awombo. E ta esõ óbiŋ ple etama. Agi e ya e bá ámama emi. Eshi e la e kpó? Agimi e la e gŋó okũ moare a wú kpokpokpko he mbo? Ba eshi ámo mi! Aba eshi dne? Ayakplo lo a shki a yi hi mvye mbo? Moare awúokũ eka ba ogbu ambo o kló o kpo ewu avẽ he. Moare awúokũ eka ba obiŋ otpiayi nga ba okro o vrẽ kpaŋ.

Moare awúokũ eka ba otum ogomnati o kló o hwyéŋ nga mbo. Moare awúokũ eka ba ekyku e kpó ómba he mbo. Moare awúokũ eka ba ehpu e tsom okro gré. Moaekŋre awúokũ eka ba arekyeŋ a ri atnéaga mo mbo. Moagogro awúokũ eka ba ogomnati ambo a sa a kpó okloashri, a kpó moakyeŋ nga a dzu moakyeŋ a zga. Moare awúokũ eka ba emvye e tpi okro ayi e shki. Moagogro a kló eshi ambo nga, mo a lu mā amo a wo ba apati mo mbo. Eshi ekahe ámo? Eshi e la e kpó ekahe? Okykueshi alo o wo ekahelo?

Anwyeamomabgo lo a sheŋ a lu adlidzi a ygi gi á okukũori la! Aŋa a lu mā alo o kyke awombo. Agimi e ká adlidzi lo amo ma? A ya a wó á Enigeriya sha ayga ba! A gbú egi hi ondayaŋ? E ka-ka-ka! Eshi e la e kpó ba agi e gŋó he? Agimi e gŋo lo awombo? Agimi e ka lo awombo? E gŋo okũ moanwyeable mo a se a ygi émvygiato ta-la awágbi ta-la anzhe ambyi a wú ba ekueku! E ka eka ba onvmo o fu moare ba eko e ri mo! E ka ba moare awúokũ ebebga áseŋ eko? Á onum ondaŋa ambo nga, okro o kpó akyuŋ mo a tá eko.

Eshi e la e kpó? Mā agimi Egŋo e b’bu e sku ahe. Mā agimi bubgu e wo ba ahelo mbo. Mā agimi é ri oreŋ lo mbo ku-ku. Nga agimi e dzu tki ekahe? Agimi e ta okpla mbo? Agimi e tno mo akplokyeŋ mbo? Mo atári gimi ekpyemgbyeŋ ángyiŋ ámo? Mo a gba a gre gimi ányu ogogre ámo le…. Eshi e la e kpó ta-la Moa-Egŋo ekahe? Mo a sheŋ ákpro a ghwo gimi ambo nga, agimi e dzú tki ekahe? Mo a kpo ambyi a ghwo gimi nga agimi e shki tki ekahe? Nga atsa ba amo a la a tsá gimi hi ba… Oshraŋ mo a la a shráŋ gimi, ta-la osoayi ba amo a la a shri a tá gimi hi ba? Mo a byle gimi mvye a khwo nga, mo a vre a dzú ónmrẽ ángyeŋ a la a ŋó gimi ámo.

E lu adlidzi e da me e gŋo, eshi e la e kpó ka-la Moa-Egŋo? Eyiŋa ambo nga moaréhpu a kpó a gré gi? Ómbomba mvye nga, mo a lú ega a ygi gimi? Águm mo lo a wo eshi edgu oshye lo nga, mo a la a zhmó gimi ómbomba tsé? Eshi e la e kpó ta-la agi ekahe? Arekyeŋ ba Egŋo nga a yi olu a ta mbo? Aba Egŋo akyeŋ nga a yi olu a fu mbo? Nga engro ekyeŋ ba Egŋo nga a yi eshyẽ moareabi hi mbo ku-ku? Mo a kpo gi eshi edgu agum lo nga ba mo atári gi ba gbagbu? Agi e ta Ahogbmre eshi edgu akpu lo nga agi eghwóbiŋ ma, nga daŋ a kyu gi abgo ómbgu lo mbo? Agi e sheŋ e nye éshi mvye ekahe ámo? Eshi e la e kpó ta-la agi ekahe? Eshi e kpo nga agi e kŋre eshri e bgá mbo kpaŋ ámo? Eshi e kpo nga agi e ká egyi e bmyé mbo ku-ku? Eshi e kpo nga agi e dzu otsotse ta-la egyi mbo? Eshi e kpo nga aba Egŋo a shéŋ omgb’ba ta-la aba Egŋo mbo ámo? Eshi e kpo nga aba Egŋo a dzú a di aba Egŋo mbo? Eshi e kpo nga aba Egŋo a fá olbi a dá aba Egŋo mbo?

Eshi e la e kpó? Ayakploabi sha mo a gŋó éshri Moa-Egŋo? Ondaŋa mo á ya á gŋo oshpa odzudzi éshri Moa-Egŋo? Eshi e la e kpó ta-la agi? Eshi ekahe? Alo o wo obubi ta-la ekplo eshriongro ángyiŋ. Ayiekŋre lo agreshri loo-lo! Eshi e la e kpó ta-la agi ekahe? Ahogbmre o ka ayiekŋre byi la! Amanyi lo agreshri, ame é zhle lo é khwo ohuhuhi mbo, ambo omba hwõ dne ámo. Ahogbmre akpoaghwo agi EBE! Amin.